ஆக்கிரமிக்கப்பட்ட தமிழர் நிலம் – உருவாகின்றது சிங்கள நாடாளுமன்றத் தொகுதி

மணலாறில் குடியேற்றப்பட்ட சிங்களக் குடியேற்றவாசிகள் தமக்கு நாடாளுமன்றப் பிரதிநிதித்துவம் வழங்கப்பட வேண்டும் என்று சிறிலங்கா அரசிடம் கோரிக்கை விடுத்துள்ளனர்.
வெலிஓயா என்று பெயர் மாற்றம் செய்யப்பட்ட தமிழர் தாயகத்தின் ‘இதயபூமி’யான இந்தப் பிரதேசத்தில் குடியேற்றப்பட்ட சிங்களவர்கள், தமது நலன்களைக் கவனிப்பதற்காக நாடாளுமன்றப் பிரதிநிதி ஒருவர் தெரிவு செய்யப்பட வேண்டும் என்று வலியுறுத்தியுள்ளனர்.


வடமாகாண ஆளுனர் மேஜர் ஜெனரல் சந்திரசிறி மற்றும் வன்னி மாவட்ட சிறிலங்கா சுதந்திரக் கட்சி அமைப்பாளர் பிறேமரத்ன சுமதிபால ஆகியோர் வெலிஓயா சிங்களக் குடியேற்றவாசிகளைச் சந்தித்து அவர்களின் பிரச்சினைகளைக் கேட்டறிந்தனர்.
இந்தச் சந்திப்பின் போதே தமக்கும் நாடாளுமன்றப் பிரதிநிதித்துவம் வழங்கப்பட வேண்டும் என்று அவர்கள் வலியுறுத்தியுள்ளனர்.
அடுத்த நாடாளுமன்றத் தேர்தலில் வெலிஓயாவைச் சேர்ந்த ஒருவரை ஐக்கிய மக்கள் சுதந்திர முன்னணியின் பட்டியலில் போட்டியிட இடமளிக்க வேண்டும் என்று சிறிலங்கா அதிபர் மகிந்த ராஜபக்சவுக்கு வேண்டுகோள் விடுக்கும் கடிதம் ஒன்றையும் குடியேற்றவாசிகள் கைளித்துள்ளனர்.

தமிழரின் பாரம்பரிய தாயகப் பிரதேசமான வடக்கையும் கிழக்கையும் நிரந்தரமாகப் பிரிக்கும் நோக்கில், மணலாறில் சிங்களக் குடியேற்றங்கள் நிறுவப்பட்டன.

இங்கு காலம்காலமாக குடியிருந்த தமிழ்மக்கள் 1980களின் தொடக்கத்தில் சிறிலங்காப் படையினரால் விரட்டியடிக்கப்பட்ட பின்னரே அரசாங்கம் இந்த சிங்களக் குடியேற்றங்கள் உருவாக்கியது.
நன்றி -நெருடல் இணையம்